【中台糾紛】陶喆老母鬧爆大陸女生勾佢個仔:根本就是被設計!

蘋果日報 最後更新: 0807 23:07 / 建立時間: 0807 19:20

 

王復蓉   

陶喆早前就同「地上最強小三」楊子晴爆出婚外情,之後搞咗個Power Point記者會,一邊道歉一邊射波俾楊子晴一邊教大家用Power Point,晚上再約老婆同友人食飯慶功咁。以為冇事啦,未幾陶生又被爆同奀星兼舊愛「乳溝妹」陳心瑩飲醉同車,仲一齊返屋企,一次比一次張揚。咁身陷陶色糾紛嘅陶生當然唔認啦,「地上最強小三」就繼續咬住唔放,寸爆男方話:「本性難移」,仲挑機話陶生之前又話發律師信俾佢,但依家仲未收到咁喎……

今日陶喆媽媽王復蓉接受台灣蘋果日報訪問,第一次講到佢點睇陶喆出軌嘅事。通常阿媽梗係幫阿仔0架啦,陶媽都唔例外,話:「公道自在人心,是大陸女生太壞了,(兒子)根本就是被設計。」

之後陶媽再話:「年輕人都會做錯事,但這件事根本是大陸女生想紅,所以設計他,媒體不斷報道,就讓楊子晴更紅。」過咗一陣之後,王復蓉就打電話俾記者,更正佢所講嘅嘢,佢話:「活到現在沒有見到像楊小姐(楊子晴)心這麼壞的人,『大陸女生太壞了』指的是楊小姐。」

陶喆喺短時間內出軌兩次(最低消費?),問到陶媽有冇安慰新抱Penny?陶媽就話:「前一陣子我養的狗過世,心情不佳,再加上兒子的(桃色)新聞,都是 Penny安慰我,她真的很乖,我們都是正派的人,卻被設計,大陸的女生真的太壞了。」拿拿拿,佢講嘅「大陸的女生」,都係one and only one指向楊子晴。

講到陶喆夜晚「義載」奀星舊愛返屋企,陶媽媽就話:「兒子就是太重朋友了,送女生回家,卻被寫成這樣,公道自在人心 啦。」成個訪問,陶媽都只係鬧大陸姑娘楊子晴,冇鬧台灣出品陳心瑩影響阿仔嘅形象…嗯……

 

 

 

 

 

http://hk.apple.nextmedia.com/enews/realtime/20150807/54063247?top=12h

arrow
arrow

    yihui517 發表在 痞客邦 留言(0) 人氣()