藝人紛紛表態撐學生 偉仔：使用過份武力

2014-10-03 08:00

平時好低調嘅偉仔，罕有地為學運發言。

由學生們發起嘅佔領行動至今已踏入一星期，除咗何韻詩、黃耀明、謝安琪同洪卓立公開表態支持活動之外，其他藝人一於避得就避，以免影響賺人仔嘅「錢途」。不過，繼前日周潤發同劉德華都為市民發聲後，噚日就連梁朝偉都開腔回應事件，為事件引來更多關注！

偉仔話：「我支持所有和平訴求嘅香港人，抗議政府使用過份武力對待和平集會人士，希望政府俾啲誠意，盡快安排同人民對話。」而深得香港人喜愛嘅民間港姐吳凱欣，喺有篩選嘅港姐選舉中大熱倒灶，輸咗名銜，但贏得尊敬。吳凱欣前日凌晨無懼大雨現身金鐘添美道通宵撐學生，一身輕便打扮嘅佢站在街頭 抗爭，並喺Instagram表示：「裝備充足，今晚風雨再大我也絕對不走。」

另一港姐，抗癌港姐林淑敏大前日凌晨都去咗旺角加入集會，其後又帶退熱貼轉到金鐘撐學生，佢話：「成日有流言話集會現場好亂，我想親身睇吓，呢班小朋友好懂事。」而蔡康年前日更身教代替言教，一家三口去到中環撐學運；一身黑衣的梁嘉琪同友人則於晚上現身金鐘，佢話：「送咗毛巾支持。」

身為人母嘅天后陳慧琳則被網友改圖胸前掛黃絲帶，她接受訪問時表示唔介意，坦言自己支持學生：「香港係一個和而不同嘅社會，好心痛睇見依家嘅情況，希望香港人唔好撕裂，作為一個負責任嘅政府，要聽取民意，盡快溝通，令香港回復秩序。」